Velheppnuð hugleiðsla

Í dag klukkan eitt hittumst við nokkrir hugleiðendur og áttum saman góða stund þar sem við hugleiddum í minningu fórnarlamba óeirðanna í Tíbet.  Veðrið var dásamlegt, sólin skein og blankalogn úti.  Við kveiktum á útikertum og breiddum úr bænaflöggum líka. Sjaldan hef ég átt betri hugleiðslustund. Fjölmiðlar voru þarna á ferðinni vegna bingós Vantrúar og var fjallað um þetta á mbl, vísi og í fréttum Stöðvar 2.  Eitthvað hefur aðeins skolast til hvað við vorum að gera, friðsamlegt og löglegt jóga?  Er til ófriðsamlegt og ólöglegt jóga ?   En það er gott að vakin er athygli á þeim hlutum sem eru að eiga sér stað og hafa átt sér stað í Tíbet.  Fólkið þar þarfnast stuðnings okkar.  Sendum okkar bestu hugsanir og kærleik til tíbetana.

Jóga fyrir Tíbet

Í minningu fórnarlamba óeirðanna í Tíbet

Vil hér með koma á framfæri þessum pósti frá Hugleiðslu og friðarmiðstöðinni. Hvet alla til að mæta!

Kæru hugleiðslunemar og hugleiðendur allir!

Vegna mikillar umræðu og góðra viðbragða við síðasta bréfi okkar eum við hér með hugmynd sem okkur langar til að koma á framfæri við ykkur og alla sem þið þekkið:

Á morgun föstudaginn langa kl. 13:00 ætlum við að hittast á Austurvelli með kertaljós og eitthvað til að sitja á. Síðan ætlum við að hugleiða í 30 mínútur til að minnast allra þeirra sem hafa látið lífið í Tíbet undanfarnar vikur. Við viljum með þessu sýna H.H.Dalai Lama samstöðu um að að ofbeldi leiði aðeins af sér ofbeldi. Lögmálið um orsök og afleiðingu er í fullu gildi því menn uppskera auðvitað eins og þeir sá. Þetta verður sem sagt minningarstund um þá sem látist hafa í Tíbet af hvaða þjóðerni sem þeir eru. Vonandi sjá sem flestir sér fært að gefa þennan hálftíma til góðs málefnis. Við mætum þarna sem einstaklingar en ekki sem einhver ákveðinn þrýstihópur.

Kraftinn höfum við sameiginlegan samt. Haft hefur verið samband við lögregluna og hún veit af þessu þannig að við erum ekki að gera neitt ólöglegt.

Verið vel klædd og með stormkerti og kanski disk eða pappaspjald til að setja það á eða bara með venjulegt kert. Þeir sem vilja sitja á jörðinni taki með sér púða eða eitthvað til að stja á.

Sjáumst sem allra flest.

Með hugleiðslu og friðarkveðju

Dagmar Vala og Halldór

Jæja, þá er maður búinn að bæta Amsterdam í borgarsafnið

Ég er að safna höfuðborgum/höfuðstöðum   Var að taka saman þær höfuðborgir sem ég hef komið til.  Þær eru: Kaupmannahöfn, Osló, Stokkhólmur, Helsinki, Lúxemborg, San Marino (heh, höfuðborgin er allt landið..)París, Amsterdam, Brussel, Prag, Búdapest, London, Edinborg(já, höfuðborg Skotlands :)) og Mariehamn á Álandseyjum (er höfuðstaður eyjanna!).  Svo hef ég komið til tveggja fylkishöfuðborga í USA, Raleigh í North Carolina og Des Moines í Iowa.  Spurning hvort maður fari að safna þeim höfuðborgum líka   Amsterdam er falleg borg, verst ég hafði lítinn tíma til að skoða hana.  Ráðstefnan var í gamalli kirkju, afar flottur staður. Orgelið enn í henni, skjárinn fyrir fyrirlestrana hékk niður úr því!!  Og nei, fór ekki í rauða hverfið og ekki á kaffihús!  Flott þessi gömlu hús og öll síkin. Fór í siglingu eftir síkjunum eftir vinnufundinn á fimmtudaginn, mjöög gaman. Frábært að sjá borgina frá þessum sjónarhóli.  Var þreytt og þæg á kvöldin, sötraði Heineken á hótelinu og horfði á sjónvarpið.  Var góð ferð bæði vinnulega og persónulega. En það er alltaf gaman að koma heim í heiðardalinn

Amsterdam baby!

Vinnuferð til Amsterdam á miðvikudaginn.  Gat ekki fengið beint flug út, flýg fyrst á Osló svo Amsterdam.  Beint til baka á laugardaginn.  Þetta er ráðstefna um hávaða í borgum - Noise in the city 2008.  Verður gaman að sjá smá af Amsterdam líka   Mikið djamm á mér um helgina, er rétt að jafna mig!  Keypti málverk - mynd mun birtast af því síðar !  En hér er ein mynd af mér og dekurdýrinu, more later darlings :)

Syfjuuuuð

Jæja, mín er mjööög syfjuð núna.  Steingrímur litli var hjá mér um helgina og ég svaf ekkert alltof mikið.  Hann er mjög hress kl. 5 á morgnanna - ég er ekki eins fjörug !  Gunna vinkona kom í heimsókn  með strákana sína á föstudaginn og færði mér pizzu.  Mmmmmmm  :D  Afar huggulegt :)  Stundaði svo mikla klósettpappírsflutninga á laugardaginn.  Sótti þrettán 45 rúllu einingar sem ég var að selja til fjáröflunar fyrir Hildu.  Við Steingrímur fórum tvær ferðir með fullan bíl!  Aumingja litli karl var umkringdur pappír en lét sér fátt um finnast.  Ótrúlegt hvað klósettpappír er þungur þegar hann er kominn í magnpakkningar!  Nú verða þrettán vinir, ættingjar og vinnufélagar með hreinan bossaling á næstu vikum, þökk sé mér :)  Á sunnudaginn fór ég með pappírinn til Steinku systur og hún og fjölskyldan ljómuðu af gleði.  Sennilega bara notað sandpappír á skikkanlegu verði fram að þessu.  Ég naut þess svo að horfa á uppáhaldsþættina mína á sunnudagskvöldið.  Top Gear strákarnir koma manni alltaf í gott skap   En nú væri gáfulegt að fara að lúlla - fyrir miðnætti svona einu sinni !

Þetta er frábært !

Arna Rún ofursæta og sagan af einfalda barnabílstólnum

Ég brá mér áðan til Möggu systur til að spila Scrabble við hana, Svanhildi og Helen.  Það sem virkilega lokkaði mig á staðinn var þó sú staðreynd að Helen var með barnabarnið sitt, Örnu Rún ofursætu með sér.  Fröken Bollukinn var í góðu skapi eins og alltaf og sat hin rólegasta við borðið með okkur og fylgdist spennt með spilamennskunni.  Við systur svívirtum hver aðra glaðlega eins og við erum vanar og hökkuðum í okkur sælgæti þess á milli.  Spilinu lauk að sjálfsögðu með sigri mínum og ætluðu fagnaðarlætin aldrei að byrja...  Helen bað okkur þá að aðstoða sig við að stilla og festa nýja barnabílstólinn hennar Örnu í bílinn.  Við náðum í kassann og kipptum stólnum upp.  Helen var afar uppæst þegar hún sá engar leiðbeiningar utan á kassanum en var svo á barmi taugaáfalls þegar hún fann hnausþykkan bækling liggjandi í stólnum sjálfum.  "Þetta átti að vera einfaldur stóll" veinaði hún en róaðist aðeins þegar ég benti henni á að þetta var í raun búnt af þunnum bæklingum á 10 tungumálum.  Við gripum þær ensku og hófumst handa.  Einfaldur stóll... einmitt það já.  Beltin í stólnum voru stillt á lægstu stillingu, sem ætluð er fyrir nýfædd börn.  Við litum á litlu fimm mánaða bolluna og sáum strax að hún yrði eins og rúllupylsa ef við spenntum hana niður í þeirri stillingu.  Við þyrftum einnig að leggja hana saman eins og vasahníf.  Við bisuðum við þetta allar systur, einnig Siggi mágur og Hilda Margrét.  Eftir blóð, svita og tár urðum við að játa okkur sigruð.  Við gátum ekki breytt stillingunní á stólnum!  Arna var sett í gamla stólinn sinn og sá nýi settur í sætið við hliðina á henni.  Annaðhvort erum við algerir asnar - eða einfaldi bílstóllinn er ekki eins einfaldur og hann var sagður vera.  Það vantar kúrs í svona stólum hjá Endurmenntun !!  Það myndi spara blóð, svita og tár !

Hilda fær viðurkenningu frá ÍBR

Í gær var hóf á Grand Hótel þar sem ÍBR (Íþróttabandalag Reykjavíkur) veitti þeim aðilum sem hlutu íslandsmeistaratitil í fyrra viðurkenningu fyrir árangurinn.  Alls voru þetta 570 manns !  Enda nóg af íþróttafélögum margskonar hér í borginni.  Ég og pabbi hennar vorum á staðnum, auðvitað að rifna af stolti eins og vera ber.  Hér með er mynd af henni og Guðrúnu vinkonu hennar á sviðinu að taka við viðurkenningunum sínum.  Held að íslandsmeistarar í frjálsum hjá ÍR hafi verið alls 22.  Stolt af að dóttirin sé í þeim flokki

Startrekking across the universe..

Hversu marga sjúkraflutningamenn þarf til að lífga við einn gest á Tupperware kynningu?

Svar: Fimm !.  Ég var sem sagt að halda Tupperware kynningu í kvöld.  Allt gekk eins og það átti að gera, búið að kynna meirihlutann af dollunum og allir búnir að koma með nokkra góða brandara.  Þá tók Magga systir eftir því að Helen systir var orðin eitthvað undarleg.  Og þá meina ég undarlegri en vanalega.  Nema hvað, hún er sykursjúk og var s.s. með sykurfall.  Hún sat á stólnum, reri fram og til baka og hneggjaði ögrandi.  Nú voru góð ráð dýr og byrjað var að reyna að koma í hana mat meðan Guðlaug frænka hljóp út í búð og keypti kók sem venjulega virkar vel á svona stundum.  Erfiðlega gekk að koma í hana kókinu, meðal annars vegna þess að hún vafraði um íbúðina og veifaði höndunum eins og dansari í teknótónlistarmyndbandi.  Hún brá sér einnig í skó eins gestanna og vappaði á þeim um svæðið.  Að lokum var ákveðið að kalla á sjúkrabíl og láta pumpa sykri í teknófríkið.  Við það kættumst við einhleypu konurnar á svæðinu, enda sáum þarna möguleika á að daðra við menn í búningum.  Nema hvað, skömmu síðar komu tveir sjúkrabílar með fimm manns innanborðs brunandi að húsinu.  Hersingin kom þrammandi inn og hljólaði beint í sjúklinginn sem á þeim tímapunkti hafði hreiðrað um sig á baðherbergisgólfinu.  Þegar búið var að hressa hana aðeins við ákváðum við að taka partíið yfir á næsta stig og reyna að bjóða sjúkraflutningamönnunum Tupperware til sölu.  Þeir fylltust þegar mikilli gleði og áhuga en fjórir þeirra náðu þó að hemja sig.  Einn þeirra kom hinsvegar inn í stofu og vildi kanna hvort hægt væri að kaupa glös á slökkvistöðina.  Hann fann ekkert sem hentaði í bæklingnum en skildi eftir símanúmerið sitt ef sölukonan rækist á eitthvað.  Á þeim tímapunkti voru félagar hans fjórir stungnir af.  Þegar hann var farinn færðist aðeins ró yfir partíið.  Eitt vorum við allar sammála um - engin hafði farið á svona Tupperware kynningu fyrr - ekki einu sinni sölukonan sem er búin að kynna dótið í 14 ár !!  Fyrir þær sem vilja krydda Tupperware kynninguna sína með óvæntri komu sjúkraflutningamanna er bent á að ég leigi Helen systur út gegn vægu gjaldi.  Treystið mér, þið munuð aldrei gleyma þeirri kynningu.