Óli og Steinar í pössun

Ég var svo stálheppin síðasta mánudagskvöld að fá litlu frændur mína þá Óla og Steinar til mín í pössun.  Foreldrarnir voru að fara til Þýskalands og drengjunum var deilt niður á æsta ættingja á meðan á ferðinni stóð.  Ég fékk fyrsta kvöldið   Þegar ég sótti þá voru þeir skv. mömmunni tilbúnir til að fara beint að sofa.  Þegar heim var komið kom í ljós að þeir höfðu önnur plön.  Þeir brunuðu inn í stofu og drógu fram allt dótið sem þeir hafa leikið sér að í fyrri heimsóknum.  Fljótlega var stofugólfið þakið dóti og hressir drengir hlustuðu ekki á neinar tillögur um að kíkja í rúmið.  Að lokum tókst mér að lokka þá í náttföt og þá fóru þeir að leika sér að jógaboltanum mínum.  Eftir nokkur slagsmál kom ég þeim inn í rúmið mitt og las fyrir þá.  Ég fór svo fram að baka bananabrauð en var trufluð á nokkurra sekúndna fresti af spurningaregni og heimsóknum frá litlum piltum   En jafnvel hörðustu hetjur verða að gefast upp, Óli sofnaði fyrst og skömmu síðar lítill Steinar sem náði þó að skjótast einu sinni enn fram í eldhús að fylgjast með bakstrinum.  Kl. hálf fimm um nóttina rumskaði ég þegar lítil rödd spurði: Svava, hvenær kemur dagur? Ég fullvissaði lítinn Óla um að enn væri langt í það.  Kl. 6 var aftur spurt, er núna kominn dagur?  Kl. hálf átta vaknaði Ólinn svo alveg og tjáði mér að nú væri kominn dagur, enda sól úti   Steinar vaknaði fljótt þegar bróðir hans fór að tala við hann og saman fóru þeir að leika þrátt fyrir tilraunir til að fá þá í morgunverðinn.  Loks tókst að fá þá að borðinu og þá fengu þeir bananabrauð í eftirrétt, þeim til mikillar gleði.  Ég skilaði þeim með eftirsjá á leikskólann og öfunda hina sem fengu að njóta þeirra restina af vikunni.

Hilda og Loðmundur

Kósítími hjá Hildu og Loðmundi

Vetrarblóm við Kleifarvatn og margæsir á Álftanesi

Á hverju ári fer Steinka systir að Kleifarvatni til að skoða fyrsta vorboðann í plönturíkinu, vetrarblómin.  Undanfarin ár hef ég skelt mér með henni og í dag fórum við þangað með Steingrím og Freyju.  Við vorum ekki svikin, um alla kletta blómstruðu vetrarblómin í vorhretinu.  Það fyllir mann alltaf af bjartsýni og gleði að sjá þessi bleiku blóm.  Tveir fýlar sátu uppi á syllu og rifust og skömmuðust yfir nærveru okkar þarna en við létum þá ekki trufla okkur og ljósmynduðum hverja blómaþúfuna á eftir annarri.  Fyrsti sumardagurinn var ansi kaldur svo við flúðum fljótlega inn í bílinn aftur.  Við ákváðum svo að skella okkur út á Álftanes í bakaleiðinni í von um að sjá nokkrar margæsir.  Þær reyndust verða aðeins fleiri en nokkrar.  Fyrst sáum við risahóp rétt við Bessastaði.  Síðan sáum við fleiri á sundi lengra úti á nesinu.  Loks keyrðum við hinumegin á nesið og sáum þar fjöldann allan af gæsum rétt við veginn!!  Við vorum ekkert smá ánægðar með þetta systur.  Ekki var verra að við sáum nokkra skarfa, lóm, duggendur, skúfendur, bjartmáf og fjöldann allan af grágæsum og æðarfuglum.  Ferðinni lauk í eldhúsi Steinku yfir kaffi og yndislegri súkkulaðiköku.  Frábær dagur í góðum félagsskap

Spilasumarbústaðarferð

Um síðustu helgi fór spilaklúbburinn saman í sumarbústað og það var 100% mæting :)  Reyndar var 120% mæting, Aron hennar Bjargar og Bryndís Huld hennar Maríu voru með   Ekki þótti mér það verra.  Við spiluðum og spiluðuml, knúsuðum börn, slökuðum á í pottinum og BORÐUÐUM!!  Já, það voru margar kaloríur innbyrtar þessa helgi!  Aðalveislan var á laugardagskvöldið, þá elduðum við lambalæri með the works.  Silla bjó til dásamlega piparsósu og svo var tonn af meðlæti til að hafa með kjötinu sem að sjálfsögðu var algert æði.  Það er gaman að fara í bústað með góðum kokkum.  Litlu krílin voru bara ljúf og góð, tók nokkrar mínútur að venjast þessum skrítnu kerlum en svo voru þau bara með í fjörinu.  Hér eru nokkrar myndir frá góðri helgi.

 

 

Tvöfalt fertugsafmæli :)

Á skírdag varð hún Magnea vinkona fertug.  Haraldur maðurinn hennar náði þeim áfanga í marsbyrjun og þau ákváðu að fagna saman = áttræðisafmæli   Það þarf vart að taka fram að veitingarnar í veislunni voru æðislegar og gestirnir afar ánægðir.  Afmælisbörnin voru í góðu stuði og fengu margt góðra gjafa.  Það var fullt af krílum að knúsa þarna fyrripartinn líka.  Æðislegt.  Um kvöldið var svo fullorðinspartí með fullt af eldvatni og fjöri.  Ég óska þeim hjónum enn og aftur til hamingju og þakka kærlega fyrir góða veislu.  Hlakka til tvöfalda fimmtugsafmælisins

Ástsjúkar kanínur!

Er að passa 2 kvenkanínur.  Þær eru til allrar lukku í búri, annars veit ég ekki hvernig þetta hefði farið.  Elsku litli kanínukarlinn minn er að deyja úr ást og hringsólar fyrir utan búrið þeirra daginn út og inn.  Þess á milli hoppar hann og skoppar eins og unglingur um stofuna.  Kerlurnar æða í hringi með látum inni í búrinu og troða trýninu út milli rimlana til þess að þefa af Casanova.  Mikið af hormónum í loftinu !  Hér er mynd af ástsjúku kanínunum

Gráhegrar, selir og fleira :)

Helgin var í alla staði frábær.  Á laugardaginn fór ég með Steinku og Gumma í fuglaskoðun út á Álftanes.  Fyrst sáum við ekki marga fugla en fundum svo tjörn með hávellum, toppöndum, skúföndum, rauðhöfðaöndum, duggöndum og ýmsu fleira.  Þegar við stóðum þarna rétt við fjöruna skaust haus upp úr sjónum.  Þar var kominn forvitinn selur að kíkja á okkur.  Freyja var steinhissa á þessu, sérstaklega þegar selurinn lét sig hverfa undir yfirborðið, erfitt fyrir hund að skilja   Eftir að hafa synt um nokkra stund barði selurinn sporðinum niður og stökk svo alveg upp úr vatninu í flottum boga eins og höfrungur!  Ég hef aldrei séð sel gera þetta fyrr !  Mjööög gaman, þarf vart að taka fram.  Laugardagskvöldinu eyddi ég svo í spilamennsku með Júllu vinkonu og fékk þar dásamlega skyrtertu.  Mmmmmmmm   Á sunnudeginum skelli ég mér aftur með þeim hjónum í fuglaskoðun og í þetta sinn fórum við á Suðurlandið.  Fórum í fjöruna við Stokkseyri og sáum þar feita seli í sólbaði og flottar toppendur.  Allsstaðar á svæðinu voru álftir á tjörnum og lækjum, gæsir voru einnig áberandi á túnum og í móum.  Á Soginu við Þrastalund sáum við svo straumendur sem reyndar flúðu fljótt en gaman að hafa náð að sjá þær.  Á bakaleiðinni ákváðum við að fara aðeins upp að Elliðavatni.  Fyrst sáum við lítið af fugli en síðan beindi ég kíkinum á einn tanga sem stóð út í vatnið.  Þar stóð eitt stykki gráhegri!!!  Við urðum öll feikiglöð að sjá þennan flækingsfugl og reyndum að komast nær.  Við Gummi óðum út í mýri í von um að ná mynd af honum.  Meðan við vorum að vaða í blautri mýrinni kom annar hegri fljúgandi og lenti skammt frá hinum!!  Bara frábært !! Við komumst það nálægt að ég gat séð þá mjög vel í kíkinum.  Því miður er myndavélin mín ekki sérlega góð í að taka svona fjarlægðarmyndir svo ég fékk aðeins afar grófkornóttar myndir en samt er hægt að greina að þetta er hegri   Þvílík sæluhelgi fyrir fuglanörd !

Pósað í eftirliti