Hissa á fótvissi

Jæja, óvissuferðin kom og fór og enn er ég í heilu lagi.  Margir höfðu samband við mig á laugardeginum og óskuðu eftir að vita hvað ég braut í þetta sinnið.  Mér fannst ekki laust við að örlaði á vonbrigðum hjá vinum og fjölskyldu yfir því að ekkert væri brotið.   Ferðin var vellukkuð í alla staði og allir virtust skemmta sér vel.  Fyrst skoðuðum við hraunmyndanir sem heita Tröllabörn sem eru rétt hjá Lækjarbotnum.  Næst var skoðuð Hellisheiðavirkjun sem við auðvitað mátum í gegnum heilbrigðisfulltrúagleraugun.  Þá var stoppað í Hveragerði og farið í leiki á planinu gengt Eden.  Loks var endað með humarveislu á veitingastaðnum Í fjöruborðinu á Stokkseyri.  Frábær matur, frábær stemning.  Þegar í bæinn var komið fór þæga fólkið allt heim en þeir sem sprækari voru skelltu sér í bæinn.  Skemmst er frá að segja að ég og Ólöf vinnufélagi djömmuðum lengst, enda ungar og einhleypar konur.  Við vorum aftur á móti ungar og frekar ræfilslegar konur daginn eftir...  En ég kvarta ekki yfir smá timburmönnum þegar fótbrotunum er sleppt. 

Athugasemdir

[Rebbý, 30.10.2007 kl. 21:14]

til lukku með árangurinn - djammið fram á morgun og ekki síður að koma óbrotin heim

[Steingerður Steinarsdóttir, 31.10.2007 kl. 12:22]

Svava var fótviss og fim

og braut ekki einn einasta lim.

Á því voru allir hlessa

að steinlá ekki eins og klessa

enda

[Steingerður Steinarsdóttir, 31.10.2007 kl. 12:22]

Úps eitthvað varð vísan endaslepp en þetta átti að vera

enda var ekki farið í gym.