Gleðilegt sumar !!!

Gleðilegt sumar allir nær og fjær   Sólin skín hérna inn um þakgluggann en af biturri reynslu veit ég að þetta er bara gluggaveður.  Veturinn kvaddi með hamförum hér í Reykjavík, húsbrunar og heitavatnsflóð í miðbænum.  Vonandi verður sumarið rólegra !  Hér í Álakvíslinni óskaði Runólfur okkur gleðilegs sumars með því að leggjast yfir andlitin á okkur og mala eins og diesel rafstöð.  Verð að játa að ég hefði kosið að kúra lengur í friði, án kattarhára í nefinu.  En sólin skín og þá er glæpsamlegt að liggja lengur í bælinu.  Best að smella sér á fætur og gera eitthvað af viti.  Eitt að lokum: Munið að skipta út nagladekkjunum (þetta voru umhverfisskilaboð dagsins ).

Sársaukafull sjúkraþjálfun

Þegar ég var krakki var það versta sem ég vissi að fara til tannlæknis.  Ég sat á biðstofunni og fann hvernig kvíðahnúturinn í maganum jókst með hverri sekúndu.  Kannski ekkert skrítið að ég hafi verið hrædd, miðað við að einn tannlæknir reif úr mér fullorðinstönn án deyfingar þegar ég var sex (sma mistök!) og annar kæfði mig næstum með flúorsýru sem lak niður í hálsinn á mér. Nú hefur hann Geir Atli tannlæknirinn minn læknað mig af þessari hræðslu og það er bara gaman að fara til tannlæknis í dag.  Í staðinn hef ég þróað með mér hræðslu við aðra heilbrigðisstétt - nefnilega sjúkraþjálfara.  Ég hef nú verið í sjúkraþjálfun í bráðum 2 mánuði og með hverju skipti eykst kvíðinn og ég hrekk í kút þegar ég er kölluð inn. Sjúkraþjálfarinn minn er afar alúðlegur og skemmtilegur, virðist í raun vera fullkomlega venjulegur, góður maður. EN... sannleikurinn kemur í ljós þegar hann fer í gang með meðferðina.  Hann beitir höndum og fótum á listilegan hátt til að ná fram sem mestum sársauka.  Ég þarf að taka á öllu mínu að snúa mér ekki við og reyna að kyrkja hann.  Reyndar hugsa ég að hann næði að kála mér fyrst...  Ég hef því komist að þeirri niðurstöðu að þó vissulega séu til nóg af tannlæknum sem eru algerir sadistar, þá komast þeir ekki með tærnar þar sem sjúkraþjálfarar hafa hælana.  KGB, Stasi og Rauðu Kmerarnir hefðu átt að ráða sjúkraþjálfara til starfa við pyntingar - þeir hefðu slegið í gegn.  En áfram held ég að fara til sjúkraþjálfarans - enda það merkilega er að eftir allar þjáningarnar er ég miklu betri.  Hef ekkert haltrað í 2 vikur !!!  Þannig að kannski eru sjúkraþjálfarar sadistar en þjóðfélagslega nauðsynlegur hópur.  Vika í næstu meðferð - hlakka ekki til en bráðum verð ég orðin svo góð að ég fer að geta steppað.  En það kostar blóð, svita og tár !

Stuð á árshátíð

Það var fantastuð á árshátíðinni í gær.  Örn Árnason var veislustjóri og hélt uppi fjörinu.  Sorphirðan kom með flott skemmtiatriði og hljómsveitin Sviss var bara mjög góð.  Ég dansaði smá þrátt fyrir fótaeymsli, það kostar sitt fyrir ónýtu ökklana að vera í spariskóm.  Kjóllinn og greiðslan voru geðveikt flott, ég fer sko aftur í greiðslu til Sillu fyrir næstu árshátíð   Party on !

Árshátíð á morgun !

Á morgun er árshátíð Umhverfissviðs haldin á Broadway.  Þar mun diskóið ríða rækjum og verða mikið stuð.  Ég fæ lánaðan galakjólinn hennar Helenar systur og mun rokka feitt.  Verst að það eru engir girnilegir einhleypir karlmenn þarna   Hvað um það, það verður happdrætti með nokkrum flottum vinningum, ég er að vona að númerið mitt verði dregið.  Miðað við mína heppni er það ekki sérlega líklegt, en maður getur alltaf vonað, eh ?  Best að fara að lúra fljótlega svo ég verði sæt og úthvíld á morgun.  Sexy beast, that's me (tralala....)!

 

 

Svava goes to Bollywood - enn og aftur !

Svava does Súðavík - the film

Svava goes to Bollywood

Jæja, ég hef farið að dæmi bloggvina og gert stutta Bollywood kvikmynd.  Njótið heil !!!

 Bollywood mynd Svövu

Steingrímur tók sex skref !!!!!!!!!!!

Í dag tók elsku litla músin mín hann Steingrímur sex skref án stuðnings á leikskólanum !!!! JÁ !!!  Hann er byrjaður að labba sjálfur !!!   Þetta er ótrúlega mikilvægt skref fyrir þennan unga pilt og boðar gott fyrir framtíðina.  Auðvitað grunaði mann að það kæmi að þessu, hann var orðinn svo öruggur að ganga með manni með bara einni hendi en samt - þetta er svo frábært og gaman að þetta skuli hafa gerst !!!   Þegar um er að ræða strák sem þarf að glíma við þær takmarkanir sem Steingrímur þarf að gera þá er þetta ekki bara sex skref - þetta eru skref með sjö mílna skóm !!!   Nú er hann þriggja og hálfs - ég spái því að hann labbi um allt í fjögurra ára afmælinu   Til lukku duglega litla mús !!!  Ég er heppin að vera stuðningsmamman þín

Wilson Muuga - vinsæll ferðamannastaður

Í dag ákváðum við systur að vera ferlega hallærislegar og skella okkur að skoða Wilson Muuga þar sem það kúrir í fjörunni hjá Stafnesi.  Ég og Steinka vorum voða fyndnar á leiðinni að skipinu - sungum Wilson Muuga, þarftu að kúka, þessu fer að ljúka, ég þarf að rjúka.  Við hlógum eins og vitleysingar að eigin fyndni, en dóttir mín sat í aftursætinu með hundinum, þar ríkti þögn. Við töldum víst að við værum þær einu sem hefðum fengið þessa hugmynd á annan í páskum í frekar köldu og hráslagalegu veðri.  Okkur skjátlaðist þar.  Þegar við beygðum inn Stafnesveg fannst okkur vera óvenju mikil umferð.  Vorum að leiða getur að því að fólk væri á leið í fermingarveislur eða eitthvað í þeim dúr.  Þegar við nálguðumst Wilson Muuga sáum við hvers kyns var.  Fjöldi bíla hafði lagt við veginn niður að fjörunni og hópur manna var að skoða skipið.  Það að skoða Wilson Muuga var greinilega the hottest thing ever. Við skelltum okkur að sjálfsögðu með hinum túristunum niður í fjöru og kíktum á skipið.  Frekar sérstakt að sjá það standa þarna, vísandi beint inn að landi.  Við stauluðumst svo aftur inn í bíl og keyrðum á brott, stæðið okkar var fljótt tekið af öðrum bíl.  Kannski að suðurnesjamenn ættu að gerast sniðugir og fara að selja pylsur og kók þarna.  Líka lítil minjagripaskip, sum kannski standandi í plastsjó með olíuflekk í kring.  Þetta er heitur ferðamannastaður, best að græða á þessu meðan hægt er  

Fagrir frændur

Glöggir lesendur hafa án efa tekið eftir því að ég hef aftur fengið snert af "Séð og heyrt" heilkenninu.  Það lýsir sér í því að allar fyrirsagnir eru tveggja orða og byrja á sama staf.  Varð bara að birta hérna myndir af sætustu frændum í heimi en ég var svo stálheppin að eyða kvöldinu með þeim.  Rúsínur !

Himnesk humarsúpa

Við Hilda skelltum okkur enn og aftur í göngutúr með þeim Steinku og Freyju.  Að þessu sinni fórum við í fjöruna við Stokkseyri, með stuttu stoppi í fjörunni við Ölfusárósinn.  Freyja var fjörug að vanda og velti sér upp úr ógeðslegum þanghrúgum, eiganda hennar til gleði og ánægju.  Við týndum allar marglitar þangdoppur og fallega fjörusteina sem nóg var af í þessari frábæru fjöru.  Þegar við vorum búnar að fá nóg af útiverunni fórum við á veitingarhúsið Fjöruborðið og fengum okkur þeirra rómuðu humarsúpu.  Mmmmm, hún er svo góð !  Við fengum ábót og ég verð að játa að ég át gersamlega á mig gat.  Um kvöldið var svo hryggur í matinn hjá mömmu svo ég sé fram á að þurfa að liggja á meltunni næstu 10 daga til að jafna mig eftir daginn.  Gleðilega páska allir saman, mínir hafa verið afar gleðilegir svo ég sofna södd og sæl.