Dásamlegt matarboð :)

Þeir sem mig þekkja vita að ég er ekki beint samanburðarhæf við Gordon Ramsey og Jamie Oliver þegar kemur að hæfileikum í matargerð.  Hafandi búið ein með Hildu og oft verið ein heima hef ég ekkert verið að elda neinar stórmáltíðir.  Saumaklúbbum hef ég oft reddað með aðstoð Bónus og bakara og stór matarboð ekki verið ofarlega á dagskrá.  Ég ákvað samt að láta slag standa svona einu sinni og bauð sex vinkonum til mín í mat í gær.  Þurfti að vísu að fá lánaða diska hjá mömmu þar sem ég á aðeins sex diska og það ljóta IKEA diska   Sif vinkona þurfti líka að hlaupa undir bagga og lána mér eitt sett af hnífapörum og nokkrar skeiðar.  Þegar ég var búin að stækka litla borðstofuborðið mitt komst ég reyndar að því að ég átti ekki nógu langan dúk fyrir það.  Ég varð því að nota tvo dúka.  Ehemm, greinilegt að ég hef ekki staðið í svona oft.  En með góðum undirbúning tókst mér að hafa allt matarkyns á réttu róli þegar gestina bar að garði.  Tekið var á móti þeim með fordrykk, sem var létt freyðivín.  Svo voru kræsingarnar bornar fram.  Koníakslegin lambasteik með ofnbökuðum sætum kartöflum, venjulegum (ljótum) kartöflum, grænum og gulum baunum, rauðkáli og salati.  Punkturinn yfir i-ið var piparsveppasósan og fyrir þær sem það vildu, spænska rauðvínið.  Allar borðuðu vel og hrósuðu matnum í hástert.  Ég er því afar ánægð með kvöldið.  Reyndar voru gestirnir svo saddir að þeir höfðu ekki lyst á eftirréttnum ! Nóg var af afgöngum enda hef ég ekki alveg reynsluna í að áætla rétta skammta.  MMmmmm, ég hef því haft nóg gott að borða í dag.  Þetta verður endurtekið við tækifæri, kannski að ég kaupi mér dúk, diska og hnífapör fyrir þann tíma

Það eru allir eins og hengdir upp á þráð í kreppunni...

Dr. Páll Þórðarson fær hvatningaverðlaun :)

Palli frændi minn frá Refstað var að fá hvatningaverðlaun fyrir unga vísindamenn í Ástralíu.  Palli er sonur Þórðar, bróður hennar mömmu.  Það kemur okkur í fjölskyldunni ekkert á óvart að hann vinni til verðlauna enda bar snemma á gáfum hjá piltinum.  Við Rebbarnir erum auðvitað gæðaætt   Hægt er að lesa frétt mbl.is hér og frétt Vísis um málið hér.  Til hamingju Palli, vel af sér vikið!!

Fló á skinni :)

Í gærkvöldi fórum við Hilda að sjá Fló á skinni eftir George Feydeau í Borgarleikhúsinu.  Við vorum svo heppnar að fá sæti á fremsta bekk og hlakkaði báðum til að prófa að vera alveg upp við sviðið.  Ég var að vísu að spauga með það í vinnunni að best væri að taka með sér hlífðarfatnað þar sem leikararnir myndu hreinlega frussa á okkur þegar við værum svona nálægt þeim.  Viti menn, það fór einmitt svo að einn leikari frussaði á okkur   Í einni senunni frussað hann vatni sem hann var að drekka af þvílíkum krafti að það ringdi yfir okkur Hildu.  Bara upplifun, híhí.  Það er skemmst frá því að segja að leikritið var bráðskemmtilegt og ég hló mikið og hátt (allt of hátt að mati dóttur minnar).  Ég mæli hiklaust með því að skella sér á sýninguna, það verður enginn svikinn af því.  Það er líka alltaf einhver sérstök stemning sem fylgir því að fara í leikhús þó svo að nokkuð sé farið af hátíðleikanum sem áður var.  Frábært kvöld, við mæðgur fórum ánægðar heim í skini friðarsúlunnar.

Dekurkanínan :)

Ísland í erlendum fjölmiðlum

Aldrei hefur Ísland fengið eins mikla umfjöllun í erlendum fjölmiðlum og núna.  Amk. hef ég aldrei upplifað annað eins.  Ekki var hægt að kíkja á bresku blöðin í síðustu viku án þess að sjá íslenska fánann,  Landsbankaskiltið eða Kaupþingsmerkið.  Ekstra Bladet danska sló þessu upp í grín og hóf söfnun fyrir bágstadda þjóð.  Um allan heim eru að birtast viðtöl og greinar um ástandið.  Tónninn er misvinalegur eftir löndum - sumstaðar eins og í Bretlandi ríkir reiði í garð þjóðarinnar sem er ansi ósanngjarnt.  Svíar skrifa um að matarskortur geti komið upp eftir fimm vikur og að þjóðin gæti orðið í áratugi að koma sér upp úr lægðinni.  Síðast núna áðan rak ég augun í grein í kanadísku vefblaði.  Þar er talað við nokkra unga íslendinga um ástandið í fjármálum þjóðarinnar.  Athygli mína vakti fyrsta sagan, um unga stúlku sem átti að hafa verið að leigja með kærastanum og þau áttu tvo bíla, nú átti hún að vera flutt til mömmu sinnar, vinna þrjú störf en eiga samt ekki fyrir skuldunum. Hmmm halló, voðalega hrundi fjárhagur hennar snöggt?  Kannski aðeins ýktar sögur... Fréttina getið þið séð hér.  Ég skemmti mér aðeins yfir því að lesa umfjöllunina um myntkörfulánin, þar sem þeir greinilega spurðu þeir einhvern íslendinginn hvað þau væru kölluð á íslensku.  Eitthvað skolaðist það nú til: "The loans, called “MyntkJorfulDan” or “breadbasket” loans, were immensely popular because of their low interest rates compared to loans based on the then strong krona".  Eitt er víst, ég er fegin að ég er ekki með MyntkJorfulDan, þá væri ég í djúpum skít núna.  Okkur vantar eiginlega gott eldgos til að komast í heimsfréttirnar út af einhverju öðru en fjármálakreppu.  Koma svo Katla !

Nóg að gera í þessari viku !

Ég er búin að vera önnum kafin þessa viku.  Á mánudagskvöldið skellti ég mér á spilakvöld með þeim Helgu og Magneu.  Að venju skemmtum við okkur konunglega og spiluðum Bohnanza, nýja uppáhaldsspilið   Ekki spillti fyrir að fá svo tækifæri til að knúsa litla Bjarna Jóhann, sem reyndar horfði frekar tortrygginn á þessar æstu dömur sem vildu endalaust hnoðast með hann   Helga mamma fylgdist vel með, enda veit hún að ég væri vís til að stinga af með ungann ef ég fengi tækifæri til.  Verst að hún veit hvar ég á heima...  Á þriðjudag og miðvikudag var svo hinn árlegi haustfundur heilbrigðiseftirlitsins og Umhverfisstofnunar, núna bættist reyndar Matvælastofnun og svo ráðuneytin tvö sem fara með þessi mál með í hópinn.  Þetta var velheppnaður fundur og eftir fyrri daginn var skemmtilegt teiti með léttum veitingum.  Í dag var svo haustferð Umhverfis- og samgöngusviðs.  Við fórum út á Reykjanes og stoppuðum fyrst við brúnna milli heimsálfanna.  Þar löbbuðum við á milli plötuskilana, voða gaman að ferðast svona ódýrt milli Ameríku og Evrópu   Boðið var upp á snarl og bjór í rokinu.  Næst stoppuðum við í orkuverinu Jörð þar sem við skoðuðum skemmtilega sýningu um orku, sólkerfið og umhverfisáhrif.  Síðan var keyrt að sjónum við Reykjanesvita og horft á stórkostlegt brimið skella á ströndinni.  Við borðuðum ljúffengan kvöldverð í Salthúsinu í Grindavík og keyrðum heim um kl. 21.  Allir voru sælir og glaðir enda frábær stemning í ferðinni.  Á morgun kemur lítill Steingrímur og mun dvelja um helgina og bræðurnir Óli og Steinar munu einnig koma í stutta pössun.  Þrír gaurar til að knúsa !  Fullkominn endir á góðri viku

Steingrímur Páll fimm ára í dag :)

Til hamingju með afmælið Steingrímur !!!!   Í dag er litli snáðinn orðinn fimm ára !  Hvað tíminn líður hratt.  Finnst það hafa verið kannski fyrir ári síðan sem ég kom heim úr ráðstefnuferð til Bandaríkjanna og sá hann fyrst fjögurra daga gamlan.  Nú er þetta orðinn stór og stæðilegur drengur.  Á sunnudaginn var haldið upp á afmælið en stjarna dagsins þjáðist af magapínu og þurfti að skreppa upp á spítala í skoðun.  Til allrar lukku löguðust verkirnir eftir skamman blund og vonandi láta þeir ekki á sér kræla aftur.  Músin verður hjá mér næstu helgi og aldrei að vita nema það verði sérstakt góðgæti á borðum í tilefni afmælisins  

Kjósið rétt í USA!

Hehe, þetta myndband er um rétta kandídatinn fyrir forseta Bandaríkjanna  Þetta er virkilega gott val: sjá hér.

Lukkuköttur :D

Birti hér með mynd af Maneki Neko, ketti sem á að færa lukku og jafnvel draga að peninga.  Endilega afritið þið myndina og komið honum fyrir hjá ykkur til að fá lukkuna streymandi að.  Manni veitir ekkert af því á þessum síðustu og verstu tímum